مهره والشله .............. {قصه حقيقيه}

عدد الرسائل : 7 العمر : 35 تاريخ التسجيل : 13/09/2007

بسم الله الرحمن الرحيم ..
مهره والشله الصاااايعه ( قصه حقيقيه )

تمشي مهره ورى المديرة وهي حايره ياترى كيف بيكون الصف
المديرة:تفضلي مهره هذا هو صفج,
مهره: شكرا،
تدخل الصف والبنات كلهم يطالعونها
مهره( في خاطرها):ليكون بس فيني شي غلط أشوفهم كلهم يطالعون؟
خذت كرسي وقعدت على اخر مقعد على يمين الصف...شوي إلا أصوات ركض وصريخ بنات وضحك ياي من بره دخلوا الصف خمس بنات من أشكالهم مال مشاكل كاسفات يدين القميص لين الكوع (ساره- حمده - ريم- عزه-فاطمه)،،،
حمده( بصوت مذبوح من الركض والصريخ):بنات وين البنت اليديده؟ مهره تلون ويها وفي خاطرها:هذه شكلها مب ناويه خير..
وحده من الطالبات وكانت يالسه جدام مهره أشرت عليها بإيدها ... مشوى صوب مهره، مهره قلبها دق دق لا اليوم بتستوي ضرابه،
حمده:السلام عليكم،
مهره وقفت: وعليكم السلام ...
سلموا عليها بيديهم،
حمده: نحن مايستروا الصف إذا شي في خاطرج نحن في الخدمة،
مهره: مشكورات...طلعوا من الصف،،،
ومهره في خاطرها: الحمدلله أني عرفت أميز بينهم وبين البنات الباقيات عشان ما أحتك وياهم ما فيني على المشاكل..... بعد خمس دقايق دشت المعلمه،
المعلمة: السلا عليكم،
البنات: وعليكم السلام ورحمة الله وبركاته،،، البنات كلهم واقفين ماعدى مهره وقفت في أخر السلام وهي مستغربه لأن في مدرستهم القبلية ما كانوا يوقفون،،، يلسوا كلهم ويلست معاهم
المعلمة: في حد يديد ولا كلكم مال السنة ألي طافت ؟؟،،
بنت في أول المقعد أسمها أسماء قالت: أبلة في بنت يديده أسمها مهره،، مهره منحرجه رفعت أيدها وخذت المعلمه أسمها ومن أي مدرسه يايه وووو......
المعلمة: وين راحت عصابة حمده؟؟ بصوت عالي ياي من خارج الصف نحن هنيه وأصوات ركض دشوا هجوم ويلسوا في أماكنهم ،،
المعلمة: لا والله متأخرين ولا بعد يلستوا،،،
حمده: يعني شو نسوي نترجاج عشان تسامحينا كنا نصلي ولا حرام،،
المعلمة: لا والله أي صلاه هاي الساعه 8 ونص حمده هذا أول يوم للعام الدراسي اليديد وخليه يعدي على خير،،،
حمده: حاضر سيدي ،، البنات كلهم ضحكوا ... بعد ما خلصت الحصه وقفت حمده على طاولة المعلمة وقالت: بنات شوفوا نحن ما بنحضر حصة سعاد خانوا بس والله قسماً عظماً ألي تقول للمعلمة بأنا شاردين لراويها الويل سمعتوا؟؟ وهي تطالع أسماء وعطتها نظرة تحذير وراحت هي وعصابتها،،،، عدت الحصة الثانية وبعدها بدت الفسحة طبعاً ومهره ماتعرف حد قعدت في مكانها والبنات كلهم طلعوا،
مهره: خيبه ولا وحده قالتلي تعالي طلعي ويانا صدق أنهم مب إجتماعيات شو هالصف ألي طحت عليه .... طلعت دفتر ويلست تكتب شعر(مهره هاويه شعر) خلصت الفسحه ورجعوا البنات،،،
فاطمة (من شلة حمده): أخيــــــــــــــــــــه يعني مالقوا غير أبله أميره الإيرانية تدرسنا إنجليزي؟؟؟...
دشت المعلمة:How are you girls?,,
البنات مع بعض: fine thank you ,,
ردت عزه( من شلة حمده): بخير الهمدلله واجد تمام..
البنات كلهم ضحكوا,,
المعلمة:عزه خلينا حلوين لا تحاولين ما بطردج بره...
ومضت الحصة مابين والدرس وتعلقات شلة حمده ألي ماتخلص,,أما الحصة الرابعة كانت فراغ وحمده وشلتها قلبوا المدرسة فوق تحت..وبدت الحصة الخامسة ومحد ياهم،،
ساره(من الشلة): ترى أنا مليت يوم نتأدب محد يانا ويوم نهيت حشرونا...راحوا الشلة ويلسوا على الأرض في الصف وبالتحديد ورى مهره بالضبط،،،ريم كانت أهدى وحده،،
ومهره (في خاطرها) ليش تمشي وياهم،،،حمدة ضربت مهره بالطبشوره على راسها مهره ألتفت مستغربة ..
حمده: مهروه عندج ورقة وقلم؟،،
مهره تبتسم (في خاطرها): صدق انها دفشه يعني لازم تظربني بالطبشوره؟؟؟؟..عطتها قلم ودفتر...
شوي إلا تقول حمده وبصوت عالي: لو بغيت أنساك وأدرس في كل صفحة حرفك وأسمك...إلى أخر القصيده..
مهره عرق ويها هذا القصيده ألي كاتبتنها نست تشل الورقة من الدفتر،،، حمده قعدت في الكرسي الفاضي ألي حذال مهره،،
حمده: مهروه أنتي عندج قلب؟،،،
مهره (وهي تضحك): وكيف أعيش من غير قلب،، حمده: عن الاستهبال أنا أقصد قلب واحد يالذكية
مهره (مستغربة): واحد شو؟
حمده: واحد تحبينه
مهره: لا
حمده وبستهزاء: عيل حق منوه هذا الشعر حق أبوج؟...ضحكوا بقيت الشلة
مهره مسكت أعصابها وببتسامة قالت: أنا هاويه شعر
نقزت ريم: مهروه دخيلتج كتبيلي شعر حق القلب مالي من أمس غالق تلفونه..
مهره( في خاطرها): توني أقول عنها هاديه ومايخصها فيهن.. وردت عليها: إن شالله ،، رن الجرس معلن نهاية الدوام ..لموا البنات أغراضهم ،،ومهره وهي تلم أغراضها شافت ريم تطلع تلفون من صدرها وتغلقه،، مهره(في خاطرها):يا قوة هالبنات تلفون في المدرسه؟؟؟
عزه (وهي تلم أغراضها): حموده الحين كيف باجر بواعده أخاف أسموه بنت المصريه تعلم علي..
حمده: خليها تجرب إذا فيها خير... بس تعال ماقلتي لي مواعده عبود؟
عزه:لا مواعده سيفوه
مهره (في خاطرها): لا هذه مب مدرسه...طلعت مهره من الصف وهي أدور باصها.. اليوم أول مره تروح بالباص
مهره: ياربي وين الحين بعرف الباص ألي يودي شعبيتنا؟ أحسن شي بروح أدق على أمايه خلهم ياخذوني البيت أحسن
راحت مهره الإدارة ودخلت مكتب المديرة،،
مهره:لو سمحتي مديره ممكن أدق على أهلي عشان ياخذوني البيت؟
المديره عطتها التلفون،،مهره دقت مره مرتين محد يرد سكرت التلفون
المديره: محد رد عليج؟
مهره:لا
المديره: خلاص روحي بالباص
مهره( بخجل): المشكلة ما أعرف الباص ألي يودي فريجنا
المديره نادت الفراشه وقلت لها تودي مهره باصها راحت مهره مع الفراشه وفي الدرب لقت ريم
ريم: شعليج مهروه بشكاره بعد
مهره: لا يمعوده هذه الفراشه أدليني على باصي
ريم: أنتي من أي شعبية؟
مهره: من الفلل اليديده
ريم: أنا بعد من هناك ...خلاص تعالي معاي خلي الفراشه تروح
ريم: اوهو باصنا بعده ماوصل خلينا نقعد تحت الضله...
وشوي وطلعت ريم تلفونها ولفت عليه الشيله وقعدت تسولف وي القلب يلي هو حبيبها.... مهره متبكه وطالع يمين يسار
مهره: ريم دخيلتج سكري التلفون لحد يشوفنا
ريم تضحك أستأذنت من القلب وسكرت التلفون
ريم:طلعتي ديايه
مهره: يا بنت الحلال هذه عليها فصل ولعوزه وفضايح
ريم: يله قومي هذا هو الباص
ركبوا الباص....وفي الشارع ريم طلعت شنطه صغيره فيها مكياج طلعت البودره ووزعتها على ويها ومهره أطالع شو وتكحلت وحطت الروج
ريم: بسم الله شفيج أطالعين
مهره: ماشي أطالع شو تسوين .... أنتي معزومه على عرس ولا شو السالفة؟
ريم تضحك: لا حبوبه أنا مواعده
مهره مستغربه: وين مواعده؟ في الباص؟؟
ريم تضحك: سكتي دخيلج لا تضيعين كحالي صدق أنج ذكيه لا يالخبله أنا بنزل من الباص عند القلب
مهره: وأهلج مابيحسون بغيابج؟
ريم وهي مشغوله بتمشيط قصتها: أبوي في أبوظبي وأمي راحت الوجن عند يدوه
مهره: انزين ريموه خبري راعي الباص يلف يمين عند بيتنا
ريم: حوه حوه رفيق روح يمين أنته وهالقرعه
مهره عرق ويها من المستحى(وفي خاطرها): صدق أنهم فضايح
وقف الباص عند بيتهم مهره تغشت ونزلت..........

عدد الرسائل : 7 العمر : 35 تاريخ التسجيل : 13/09/2007

و هذا الجزر الثاني

مهره دخلت البيت وتسبحت وصلت وقعدت تفكر في ألي صار اليوم في المدرسة ،، راحت عند ختها ميثه، ميثه أكبر من مهره بخمس سنوات عمرها 23وعصبيه شوي خلصت ثانوية وما حبت تكمل الجامعة وهي حاليا مخطوبة
مهره:ميثوه فتحي الباب
ميثه:خير
مهره:حشا ما باكلج ابغي أسولف وياج
ميثه فتحت الباب لمهره وفي أذنها سماعة التلفون تكلم خطيبها على التلفون
مهره: ميثوه بسألج سؤال؟
ميثه: أوف ماتشوفيني أرمس علوه صبري شوي
(خلونا ننتقل إلى ريم وموعد الغرام)
ريم: خالد أنته قلت بتخطبني في نهاية هذا الشهر
خالد: وبعدين ما خلصنا من هالسالفه ترى قتلج خليني أكون نفسي بالأول وتالي يصير خير
ريم: أنا مليت من حياة الخش والدس وبعدين أنته تشتغل والحمدلله
خالد: يعني أي واحد يشتغل خلاص صار يقدر على مصاريف الزواج؟
ريم: خالد أنا احبك ومستعده أعيش معاك تحت شجره
خالد: هذا الكلام الحين بس تقولينه.....أقول حبيبتي مب كنج تأخرتي ؟؟؟؟
ريم أطالعه (وفي خاطرها):لهدرجه يا خالد حتى مو متحمل تقعد وياي وين خالد الأولي ألي يترجاني أقعد دقيقة زيادة ،،،،
فتحت باب السياره ومن غير ماتقول مع السلامه نزلت
(نرجع لمهره وختها ميثه)
ميثه: يله أسألي يا ست مهره
مهره:تو الناس كان قعتي ساعة زياده بعد
ميثه: أقول أسألي بدون حشرة وعور راس
مهره: ميثانه الحين أنتي تحبين علوه خطيبج صح؟
ميثه مستغربه: أكيد لأن هو خطيبي بس ليش السؤال؟
مهره: لا أنا أقصد قبل مايستوي خطيبج؟؟؟
ميثه: نسيتي يالذكيه أن علي مو من أهلي يعني ما عرفته إلا يوم خطبني
مهره: أنزين فرضنا أنج عرفتيه قبل وكلمتيه على التلفون وطلعتي معاه تتصورين بيحبج أكثر لأن بداية علاقتكم حب؟
ميثه: مهره شوفي خذيها قاعده الريال لما يتعرف على البنت مايبي منها غير تسلية وتمضيت وقت لأن حاط في باله أنها مثل ما كلمته كلمت غيره وشو يضمن له أنها ما بتكلم بعده؟؟
مهره: بس أنا أشوف شي ثاني لأن مو كل الشباب والبنات نفس الشي بعدين الحب يخلي الإنسان يولد من أول ويديد لأن الحب يغير الإنسان
ميثه (ماعرفت شو ترد): أقول مهروه ليش مهتمه بالسوالف؟؟
مهره: جذيه من باب الفضول
ميثه: لو أنج مب أختي ألي أعرفها جان قلت أنج طايحه في شباك واحد.....
مهره: مستحيل صح أنا ما أعترض على الحب لكن تربية أهلي ماتسمحلي أحط عيني بعين واحد
ميثه أرتاح قلبها بعد كلام مهره طمنها أن أختها عاقل،،،
(نرجع لريم)
دشت البيت وكان فاضي وعقت الشنطه على الأرض ونسدحت على الكرفايه لا صلاه ولا عباده مسكت الموبايل بس القلب ما دق وهي نازله زعلانه من عنده التلفون ساكت حتى مسج ماوصلها
ريم: أمري لله ولو أنا الزعلانه بستوي أحسن منه وبتصل
دقت بس كل ماتضرب إرسال يعطيها أن المكالمة محظوره
ريم: شو السالفه أن مجدده البطاقة من أربع شهور ما واحت ليكون بس.......
(ننتقل إلى حمده)
حمده في البيت يالسه على الجات ترمس مخاوي الليل على الخاص وتألفله قصة أن أمها ميتة وعايشة تحت تعذيب أبوها وووو شوي إلا أمها تدق الباب (أم حمده هندية كانت تحمل الجنسية الاماراتية بس لما توفى أبو حمده تزوجت هندي وسحبوا عنها الجنسية)
أم حمده: همده يله تعالي غدى
حمده: أوف ... ماريد
أم حمده: بنتي ما في زين لازم تاكلي تعالي
حمده: كومار موجود؟
أم حمده: لا عم مال أنتي يروح دبي
حمده: كم مره قتلج لاتقولين عمي؟ يعله إن شالله يروح ولايرجع
(ننتقل عند عزه)
مشغلة أغنية مانسيتهم وتكلم سيف
عزه: شو تباني ألبس باجر؟
سيف: ألي يعيبج....بس لو يكون أحمر زين
عزه: إن شالله حبيبي
فجأه تلفونها الثاني يدق عليه عبدالله ومن حظها كان صامت
عزه: سوافي أمي تناديني شوي وبتصل باي
سكرت المسجل وردت على عبدالله، عزه (تحاول تغير صوتها أونها كانت راقده): ألو
عبدالله: هلا عمري
عزه (بستهبال): كم الساعه؟؟
عبدالله: 3 الظهر
عزه: يالله رقدت وما حسيت بعمري.....
(تحاول تقنعه بأن مافي شي يشغلها عنه لأن عبدالله مسكين يحبها وناوي يخطبها)
عبدالله: عزوه أبي أشوفج باجر
عزه (برتباك): هــــا ....باجر...تشوفني ....كيف أمتحان عندي ما أقدر
عزه (في خاطرها): هذا ما لقى يشوفني إلا باجر يوم واعدت سيفوه
(ننتقل إلى ساره)
ساره يالسه وي أمها
ساره: أمايه لاتحاولين مستحيل أخذ حمدان عماني وراتبه4000 درهم شو يسون هذيل؟
أمها: الحمدلله يا بنتي في شباب للحين ماحصلوا وضيفة..وشو فيه يعني لو كان عماني بعدين حمدان ولد خالج ويحبج
ساره: حبته قرادته وقطعته
أمها: سبحان مغير الأحوال قبل سنه كنتي بتموتين علينا من الفرحة لما طلب أيدج من أبوج
ساره: كنت ياهل ما أفهم....خلاص لا تفتحون موضوع حمدان مره ثانية أنسوه مستحيل أخذه
قامت من عند امها ودشت غرفتها وقفلت الباب وطلعت الموبايل من تحت السرير لقت 9 مكالمات لم ير عليها
ساره: هذا كله من أمايه وحمدان القلب أتصل وما رديت عليه وحليله
أتصلت عليه وقعدت تسولف وياه
(وأخيرا ننتقل إلى فاطمه) "أدري أنتي شتتكم معاي بس بغيت أعطيكم خلفيه عن حياة كل وحده من الشلة"
فاطمه أخوها كشفها ثلاث مرات أن عندها موبايل بالدس... فصاكين عليها صكه فمافي شي جدامها غير النت
فاطمه يالسه على برنامج الفووتو شوب تغير في صور الفنانات وتحطها عالماسنجر وتقول لشباب هذه صورتها وقاعده تتأفف لأن المايك خربان
وفي اليوم الثاني.....في المدرسه الساعة 7 ونص قبل الطابور حمده وعزه عند بوابة المدرسة
حمده: الحين روحي بس الساعه 1ونص كوني عند البوابة لأن الحارس بيفتحها عشان البنات ألي يروحون بالسياره وفي هالحظة أنتي دشي وركبي الباصok؟
عزه: حموده قلبي يدق وبطني يعورني
حمده: ألي يسمعج يقول أول مره تطلعين
عزه: لا مب جذيه بس حاسه أن اليوم مش طبيعي
خلص الطابور وراحوا البنات الصفوف
المعلمة: وين عزه؟
حمده: مريضة أبلة
المعلمة: سلامتها
بعد ما خلصت الحصة مهره رايحه صوب ريم تعطيها القصيده ألي طلبتها أمس
مهره: السلام عليكم
ريم وحمده وساره وفاطمه: وعليكم السلام
مهره: هاج ريم كتبت لج القصيده
ريم(وملامح الحزن على ويها):لا خلاص ماريدها مايحتاي
حمده: ليش؟
ريم: شكله ودرني قطع البطاقة
حمده: أفا عليج يالغالية اليوم يبلج أحلى بطاقة ولا تكدرين بخاطرج
مهره تسمع الحوار والعروض
ريم: المسأله مو مسألة بطاقة ياحمده أنا أحبه
فاطمه: تستاهلين يا الطمه هذا وأنتي ماتخونينه
ساره: شو رايج تتعرفين على أخو حبيبي ترى طيب وحبوب و....
مهره تقاطع ساره: لا هذا مب حل تنتقل من جرح إلى جرح بالعكس المفروض هالفتره تقعد وتريح أعصابها لأن مشاعرها مجروحه وأي شعور في هالفترة بيكون ناتج من إنفعالها
حمده: تكلمت الفيلسوفه
بس ريم شكلها أقتنعت بكلام مهره............
بدت الفسحه وطبعا مهره ماعندها حد يلست كالعاده ماسكه القلم والدفتر تكتب قصيده او خاطره بعد ماخلصت رفعت راسها ولقت ريم حذالها
مهره: بسم الله الرحمن الرحيم
ريم تبتسم: خرعتج
مهره: لابس على بالي محد في الصف غيري
ريم: ماكان لي نفس أطلع
وقعدوا يسلفون.................
ساره وحمده وفاطمه في الحمام
حمده: شت موبايلي مفضي ..ساره عطيني موبايلج
ساره: هاج بس فيه حق دقه
حمده: حشى يالزط بطرشلج رصيد
حمده: أوف هذه ماترد نبي نطمن عليها
ساره وفاطمه: منوه؟؟؟
حمده: عزوه اليوم مواعده
فاطمه: حموده حبيبتي تصدقين انا أعتبرج مثل أختي ويمكن أكثر لأنج طيبه
حمده: الزبده سرعة
فاطمه: أبي موبايل قبل مايصيبني جنون مليت من المسن والمشكله المايك خربان
حمده: لا حبيبتي عطيتج مرتين يالبقره وأخوج سعدوه كشفج وخذ الموبايل وسوالي مشاكل لا أسفه حبيبتي
(ننتقل إلى عزه)
عزه في السياره وسيف نازل المطعم ياخذ كوكتيل ...... بس فجأه وقف تكسي يمب المطعم والصدمه نزل منه عبود كنه حد صب ماي بارد عليها ...دخل عبود المطعم والمشكلة الكبيره سلم على سيف وقعدوا يسلفون
عزه: ياربي طلعوا يعرفون بعض شو أسوي أخاف سيفوه أيبله طاري عني .... لا رحت فيها اليوم
رن تلفونها سيفوه يتصل
عزه: خلاص أنكشفت،،، ردت عليه: ألو
سيف: عزه حبيبي بيركب ويانا ربيعي عبدالله مسكين سيارتة خربانة
عزه(وهي ترتجف): شو....لا...لا...أقصد أستحي
سيف: عادي هذا ربيعي روح بالروح
عزه(في خاطرها): ربيعه روح بالروح يعني مافي مجال للكذب ما أقدر أقوله أنه يقربلي ولاتركبه.....ولا أقدر أوقول شي خلاص رحت فيها
سيف: ألو....ألو...... عزه......ألو

عدد الرسائل : 7 العمر : 35 تاريخ التسجيل : 13/09/2007

إليكم الجزء الثالث
سيف وعبدالله يمشو صوب السيارة وعزه خلاص موحاسه بالدنيا .... تغشت وغمضت عينها تتمنى لو انه يصير حلم .........ركبوا السيارة
عبدالله: السلام عليكم
عزه ماردت خايفه يعرف صوتها......:icon_razz
سيف: عزوه ردي على الريال
عبالله : خلاص سامحتها دام أن أسمها عزه
سيف: هاعبود من من عزه؟ تحب من ورانا؟...........(عزه تيبست مكانه):icon_conf
عبدالله: لا مامن وراكم إن شالله بيكون عرسنا قريب وانت وعزه معزومين
سيف: مبروك ياريال انزين أسمحلنا عاد ركبناك ورى
عبدالله: لا عادي................... (وهم يسولفون وعزه جثه متيبسه على الكرسي)
ننتقل إلى المدرسة
ساره وفاطمة وحمده عند المديره لأنهم ماحلين الواجب
المديره: والحل وياكم يعني؟
ساره: صدقيني يا مديره انها أول مره ما نكتب فيها الواجب
المديره: وطبعا مش أخر مره لأن الفصل الدراسي توه بادي
حمده: خلاص التوبه
فاطمه: خلاص أخر مره تشوفين رقعة ويوهنا هنيه:a_smile_g
المديره: بسامحكم بس بشرط توقعون تعهد ماتعيدونها
حمده وساره وفاطمه: إن شالله
ننتقل لعزه ومشكلتها
سيف وقف في باركن قدام محل
سيف: حبيبتي أنا نازل شوي ...عبدالله أمنتك الله بخلي القلب عندك إياني وإياك تقرب منها
عبدالله: إن شالله ولايهمك
(عزه تحاول تفهم سيف بالحركات لاتنزل لكن مانتبه لعزه ونزل.... خلاص بقت عزه وي عبدالله بروحهم عزه قلبها بيوقف........... شوي تلفونها يدق حمده تتصل ..... كيف ترد؟؟ ماتريد عبدالله يسمع صوتها؟؟؟؟
عزه(في خاطرها): وينك ياسيف وصلني المدرسه بسرعة أخاف بس عارفين السالفه ونذلوا فيني ياويلي
عبدالله: إذا مستحية انا بنزل
(عزه ماردت........ عبدالله فتح الباب ونزل...................عزه تتصل على حمده سرعه)
عزه: حمده لحقي علي
حمده: خير شو صاير؟؟؟...................(بعد ماخبرتها السالفه......دخل سيف السيارة وفي إيده كيس)
سيف: وين عبود؟
عزه(برتباك): أنا شدراني عنه؟؟ نزل مادري وين راح؟؟ أنا مايخصني فيه.... أصلاً أنا معرفه
سيف مستغرب: عزه بلاج؟ أنتي مش طبيعية أخاف بس عبود زعلج في شي؟؟
عزه: لا بس أرجوك وصلني المدرسة
سيف: خليني أتصل عليه أول............. مايرد الحين أروح عنه ولا شو؟
عزه: هيه هيه روح بتأخر حمده دقت علي تقول لازم أرجع بسرعة قبل مايكشفوني في المدرسة
سيف: خلاص أوكي الحين بنروح بس خذي هالكيس
عزه: شو هذا؟
سيف: هدية بسيطة
عزه: مشكور بس يله نروح
(نزلت عزه عند البوبه والبنات ظاهرين لسيارات....ومن غير محد يلاحظ دخلت بسرعه داخل...عزه تمشي ودموعها اربع اربع ولقت في طريقها ساره وحمده وفاطمه..مسكت بيد حمده وهي تصيح)
عزه: حمده لحقي علي أنا خلاص ياحمده خلاص
حمده: شو السالفه؟
عزه: عبود كشفني بيتركني خلاص
حمده: لا عبود توه داق علي يتخبر عنج يقول انج ماتردين عليه
عزه(وهي مصدومه):يعني ماعرف شي؟؟؟ ماقالج شي عني؟؟
حمده: أقولج يسأل عنج يعني ماعرف شي يله روحي غسلي ويهج بنلحق على الباصات
ننتقل إلى مهره
مهره وصلت البيت وكل العادة تسبحت وصلت الظهر وتغدت طلعت كتبها تراجع وتحل واجباتها
وعلى الباب دق دق
مهره: من؟
ميثه: أنا ميثوه
مهره: هبطي تعالي الباب مفتوح
(ميثه دخلت وحاطه قناع تنظيف على ويها )
مهره: بسم الله الرحمن الرحيم
ميثه: شو شايفه جني؟
مهره: لا ام دويس
ميثه: بايخه.....تعالي بحط لج من هالقناع شويه وايد زين
مهره: لا لا شكراً ماريد قاعده احل واجباتي
ميثه: كيفج بس لأن عرسي قريب قلت بنهتم ببشرتنا شوي
مهره: ليش منو العروس أنا ولا أنتي؟؟
ميثه(وبغرور): طبعا انا فديتني
مهره: ميثوه طلعي حبيبني برى وخليني أعرف احل واجباتي
ميثه: مو منج مني أنا ألي قلت بهتم ببشرتج مالت عليج..........طاااااااااااااااخ سكرت الباب بقوه وراها
ننتقل عند فاطمة
سعيد ماسك فطوم من شعرها
سعيد: قوليلي منو هذا ألي مسيفه صورته على الكمبيوتر؟
فاطمه: ماعرف ماعرف
سعيد: عيل منوه ألي يعرف؟
فاطمه تصيح: هدني أقولك ماعرف
سعيد: فطوم صبرت عليج وايد أبا أعرف أنتي وين تبين توصلين وين؟؟
فاطمه وهي تصيح: أي هدني قطعت شعري
(سعيد رمى فاطمه على السرير)
سعيد: شوفي من اليوم ورايح طلعه من البيت ماشي
فاطمه: وأنا من متى أطلع أصلاً؟
سعيد: جـــــب لما أتكلم أنتي تسكتين فاهمه
فاطمه: لوكان أبوي عايش كان بيوقفك عند حدك
سعيد: لومت أخاف من الله كان ذبحتج وإذا شفتج طالعه برى هالغرفه حشيت ريولج حتى مدرسة
فاطمه وهي تصيح:ياربي أنا شو سويت عشان أبتلي بأخو مايرحم شو سويت؟؟
ننتقل إلى ساره
ساره يالسه قدام التلفزيون تتابع (مسلسل دارت الأيام) وفجأه يدق جرس البيت لبست شيلتها وراحت ورى الباب
ومن ورى الباب: أنا حمدان
ساره: أووووووه لحظه:icon_angr .................أمايه ولد أخوج برى
أم ساره: حمدان؟
ساره: هيه
أم ساره: صدق أنج ماتستحين وليش ماقلتيله يتفضل؟؟
ساره: قوليله انتي ....ودخليه الميلس أنا يالسه أتابع مسلسل دارت الأيام في الصاله
أم ساره: دار راسج ياربي حمدان مب غريب عشان مايدخل الصاله هذا ولد خالج
ساره: اووووووه ماصار ولد خال هذا........ رئيس مجلس الوزراء
ننتقل إلى حمده
حمده يالسه تسحي شعرها في الغرفه رن تلفونها........... عزه تتصل
حمده: ألو ها عزه بشري؟
عزه: ما اتصل فيني بموت حمده
حمده: طيب انتي اتصلي فيه
عزه: هااااااااا ما أقدر شو أقوله؟؟؟
حمده: خلي الوضع عادي اتصلي ولا في الخاطر
عزه: اوكي بحاول بس لو طلع عارف السالفه بموت
حمده: انتي جربي الحين....يله بالتوفيق
(سكرت التلفون وراحت الصاله ..........شافت كومار زوج أمها وأمها في الصاله يشرب شاري)
حمده: أخيـــــــــــــــه أنت شو تسوي هنيه؟؟ يله أطلع برى أريد أيلس أشوف التلفزيون يله
أم حمده: ليش حمده انتي جذيه عيب هذا عم مال انتي عيب
حمده: كم مره قتلج لاتقولين عمي ؟؟
(قامت أم حمده وشلت شاي وقالت لكومار:"تشلوه= نروح" وراحوا من الصاله......... حمده قعدت على الكرسي وشلت الريموت وتبدل في القنوات)
ننتقل لريم
ريم تلم صور خالد وهداياه في كيس ... مسكت رسالة كاتب فيها "" أنا من غيرج كيف أعيش""....(نزلت دموعها على خدها)
ريم: مو أنت يا خالد بعدي كيف تعيش أنا ألي من بعدك كيف بعيش؟؟؟
(وقعدت تذكر خالد وماقفه .....وطلعاتهم.....وسوالفهم .......وقطع سرحانها دقت الباب دق دق...)
ريم تمش دموعها بسرعه: منوه؟
البشكاره: تلفون صديق مال انتي
(ظهرت الصاله وشلت سماعة التلفون )
ريم: ألو
مهره: هلا وغلا
ريم بفرحه: مهروه هلا شخبارج؟
مهره: طيبه الحمدلله أنتي شخبارج؟
ريم تتنهد: أه زينه
مهره: خلاص ريموه إذا على خالد أنسي ألي صار صار ....ولا في شي يديد؟؟
ريم: لا
مهره: حليتي الواجب يالكسوله؟؟
ريم: للحين لا
مهره: لا تنسي تحلينه وإذا ما عرفتي دقيلي بساعدج
ريم:ماتقصرين
(وسالفه ورى سالفه ............)
ننتقل لعزه
عزه ماسكه موبايلها ولا قادره تتصل على عبدالله
عزه: خلاص عبود كشفني مابيدق................( تغيرت ملامح ويها وبدت تصيح...............فجأه اتصل عبدالله..عزه رمت الموبايل من أيدها وصرخت....)
عزه: لا ماقدر ماقدر شو أقوله؟؟؟ شو

ان شاء الله بنكمل لكم القصه .................